LUANGPAWN KHUA

 Luangpawn hi kan Pu Lalbawnga te lo din a ni a, kan chhungkaw chanchin kan chhui hlat theih deuh leh mumal deuh taka kan hriat theihte chu Luangpawn awm lai hi a ni a. Chuvangin, ka pianna khua ni lo mahse Luangpawn hi ka khaw ngaihhlut em em, ka khua anga ka chhal a ni ve a. Kan chhungkaw chanchin hi phak ang tawkin ka chhui ve thin a, kan chhungkaw chanchin hlui te chu Luangpawn khaw chanchin hlui te pawh a ni ve zel a. Chutiang taka Luangpawn nena inkaihhnawih, Luangpawn khaw neitu chhungkua chu kan nih ve a, Luangpawn chanchin ka hriat ang ang thenkhat hi kan dah ve ang e - Buata Bawitlung

Luangpawn hi Mizoram hmar lam Mawmrang Tlang dung, hmar lam chung zawl a awm niin, Saitual District, Phullen Block a awm a ni. Aizawl atangin Saitual leh Phullen paltlangin Motor kawngpuiin a tlawhpawh a. Aizawl atanga Kilometer 146 a hla a awm a ni.

Luangpawn hming put chhan leh a awmzia:

Luangpawn tih hming a put chhan nia an sawi chu, helai hmun vel hi rambua niin Luang a tam hle a. Chuvang chuan helai vela lo awm hmasa Vaiphei hovin LUANGPAWN tiin an sawi ta ni a ngaih a ni. LUANG chu hnim chi khat hming a ni a, PAWN chu rambua an sawina a ni a, tichuan LUANGPAWN tih chu Luang hmun, rambua tihna a ni.

Luangpawn lo pian dan:

Luangpawn hmunah pawh hian Hmar/Vaiphei te pawh an lo awm tawh thin nia ngaih a ni a. Tin, Siakzapauva leh a hote pawh he lai velah hian rei vak lo chu an lo awm  tawh nia ngaih a ni a, Mawmrang kham kara him taka awma an inngaih laiin Leilawn hmingthang tak, Ar Lei an pheh loh avangin Lalsavunga pasaltha Vanapa ten an run ta hlauh a ni.

Kan pi leh pute kha khaw hmun sawn kual fo thin an ni a. Lalbawnga (Bawitlung) leh a hoten kum 1893 velah Luangpawn hmun hi sat chhuakin an luah a, khua an din ta a. Tichuan, Lalbawnga chu Luangpawn sat dintu leh Lal hmasa ber a lo ni ta a ni. Khua anga mumal taka an kai a, an inbenbel hi kum 1906 vel nia ngaih a ni a. Hei hi Lalbawnga fapa Thanghrima’n, “Luangpawn kan kai hian kum 6 mi ka ni” a tih atanga ngaihdan lo piang a ni.

Lalbawnga leh a hoten Luangpawn an luah atang hian, kum 1968 a khaw khawm a nih a Luangpawn khua chu Phullen-a insawn tir vek a nih thleng khan mei mit lovin an luah a. Lalbawnga hnuah hian Lalbawnga ngenna angina Vanphunga Sailo fapa Lalbuaia Sailo chu kum 1912 kum tawp atangin Luangpawnah hian a lal zui leh nghal a ni.

Lalbawnga hnuah Lalbuaia a lal:

Luangpawn lal Lalbawnga hi lal fing leh fel tak a ni a, a khaw thenawm Sailo lal Vanphunga leh lal dangte nen pawh an in pawh tha hle a. Lalbawnga hian lal nih chu nuam a ti vak lo va, Vanphunga Sailo hnenah chuan a (Vanphunga fapa) fapa Lalbuaia Sailo chu Luangpawnah lal a dah turin a dil a. Tihtak meuha a dil avangin Lalbuaia Sailo Vanbawnga awm mek chu kum 1912 kum tawpah Luangpawnah lalin a awm ta a. Tichuan, Luangpawn lal hmasa Lalbawnga chu Khawnbawl Upa-in a awm zui ta a ni.

Lal ban leh Village Council din:

Ram inrelbawlna a danglam ve zel a, Mizoram khaw hrang hranga Lal te rorelna chu kum 1954-ah tih tawp a ni ta a. Mizoram khawtlang inawpna chu tidanglamin khaw tinah Village Council din a ni a. Village Council inthlan hmasa ber hi July 24, 1954 khan Mizoram pumah thlan a ni a. Luangpawn-ah pawh a vawi khat nan kum 1954 ah Village Council hmasa ber tur thlan a ni a, chuta an thlan Luangpawn Village Council hmasa ber te chu hengte hi an ni:

Thanghrima              –        President

Thangdama               –        Vice President

Chawiliana                –        Secretary

Kapvela                    –        Member

Liantawna                 –        Member

Tihluihna avanga Luangpawn rauhsan:

Mizoramin India laka zalenna a sual lai khan Mizoram khaw tam tak chu an bul hnai khaw lian zawkah tihluihnain an pem khawm tir a, chu chu Khaw khawm emaw Khalhkhawm emaw tiin an sawi thin. Ram buai lai a ni a, khaw danga insawn tura thu pek hi zawm loh ngam chi a ni lo. Luangpawn khua pawh April ni 14 & 15, 1968 khan India Sipaite tihluihna avangin Phullen-ah khalhkhawm an ni a. Tichuan, hun rei tak mei mit lova an lo luah lum tawh Luangpawn hmun chu rauhsanin a ni ta a ni.

Luangpawnah let lehin Thlawkbawkin an awm:

Tihluihna avanga Phullena awm Luangpawn khaw mite chuan an pian leh murna Luangpawn chu an ngei hle a. Mizoram buai zualpui chuan ziaawm lam a pan ve hret hret bawk a. Kum 1972 ah Luangpawn khaw mi chhungkaw 14 zette chuan Phullen atangin Luangpawn ramah hian Lo an nei a. Riahbuk sualin Buk an sa a, an thlawh hma chu riah chilhin Bawk angina an awm a. Tichuan, mumal deuh zawka awm a tha e tiin Luangpawna Bawk khawha awmte chuan hruaitu an in thlang thin a. Luangpawn Bawk hruaitu hmasate chu hengte hi an ni:

B. Kamliana             –        Chairman

K. Fehkhama            –        Vice Chairman

Chawngthanga                   –        Secretary

Village Council neih leh a ni:

Mizoram buai khaw khawm laia India sipaite tihluihna avanga Luangpawn khawtlang mipuite Phullen lama an insawm tir vek avang khan Luangpawn Village Council pawh kum 4 dawn chu a tawp a. Kum 1972 atanga Lo nei a Bawk anga an awm leh hnuah, sawrkar hnenah khua anga pawm tur leh Village Council neih phal turin dilna thlen a ni a. Tichuan, sawrkar chuan kum 1983-ah Luangpawna Village Council din thar leh chu a rem ti a, February 23, 1983 ah khawtlangin VC thar lawmna hun hman a ni. Khaw khawm hnua Luangpawnin VC a neih leh hmasak bera member te chu hengte hi an ni:

Lalkhawdina        –        President

Ralkapkima          –        Vice President

Chawngthanga     –        Secretary 

K.Fehkhama                  –        Member 

Rosiamliana                   –        Member 

Tichuan, kum 1983 a Village Council din that leh a nih atangin tun thlengin mei mit lovin Luangpawn hi a awm zui ta a ni.